Sa ki pa té dwèt rivé, rivé...

Dèpi près on mwa, kolèktif-la an lyannaj èvè pèp gwadloup ka manifèsté adan on lèspwi a dignité , solidarité. Toutmoun konstaté, jou apré jou, chak pawtisipan ka kanpé si pozisyon a yo, an pawtikilyé Léta é Patwona. Yo ka mandé biten, men yo pa ka pwopozé hak.
Dèpi lendi manifètasyon-la touvé-y adan lobligasyon mèt sa pli ho, davwa ayen pa té ka vansé adan dosyé-lasa. Ka nou vwè? Lalwa ka arèsté manifèstan anlè piké grèv é mété yo lajòl.

Tousa sé té san konté si on kouch a popilasyon-la ki jous alè pa té gyè fè palé dè yo, men ki té la ka atann yenki on glisé pyé pou pé sa mèt yo annaks: sé jenn-la. A ki yo?
Sé jenn ki an majorité pa ka travay, pa ni fòwmasyon é ki pa ni ayen pou fè tout lajouné. A pa ni yonn, ni dé, men on bon enpé, pas pa obliyé nou ni près 40% chomè é adan yo  sé près yenki jenn.

Yèswa, on nonm mò. On sendikalis pèd vi a-y. Sa ki pa té dwèt rivé , sa moun té ka krenn, fin pa rivé. Alè toutmoun ka bay ta yo si kimoun ki  rèsponsab.

Men sa nou pé di , an tan kè sendikalis, sé kè on kanmarad sendikalis an nou mò adan sa. Nou ka voyé on bon fòs é kouraj ba fanmi a-y é zanmi a-y . Nou ka mandé tout kanmarad sendiké a SE-UNSA a lyanné èvè nou pou voyé fòs ba fanmi a kanmarad sendikalis Jak BINO.

                                                                                                                                                                            Konséyé Sendikal

                                                                                                                                                                                    Fiwmen T.